તેમના જન્મ સમયે ચહેરા પર જે સ્મિત હતું તેને જોઈને સ્મિતાના મમ્મી વિદ્યા તાઈ પાટિલે તેમનું નામ સ્મિતા રાખ્યું હતું. ફિલ્મોમાં મોટે ભાગે ગંભીર ભૂમિકાઓમાં દેખાયેલાં સ્મિતા વાસ્તવિક જીવનમાં ખૂબ નટખટ હતાં.
ફિલ્મોમાં કામ કરતા પહેલા સ્મિતા દૂરદર્શનમાં મરાઠીમાં સમાચાર વાંચતાં હતાં. સમાચારમાં સાડી પહેરવી જરૂરી હતી અને સ્મિતાને જીન્સ પહેરવું પસંદ હતું તેથી ન્યૂઝ વાંચતી વખતે તેઓ જીન્સ પર જ સાડી પહેરી લેતાં હતાં.
ભૂમિકા, મંથન, આક્રોશ, ચક્ર, ચિદંબરમ, મિર્ચમસાલા જેવી આર્ટ ફિલ્મોથી તેઓ એ એક વિશિષ્ટ સ્થાન મેળવ્યું હતું .
ફિલ્મ ક્રિટીક્સ એવું માનવા અને કહેવા માંડ્યા હતા કે પેરેલલ સિનેમાની આ અદ્ભૂત અદાકારા કદીય કમર્શિયલ સિનેમામાં પોતાની કમાલ નહીં દેખાડી શકે અને હીટ નહીં જાય. સ્મિતાએ તેમના પર થતી આ કમેન્ટને સકારાત્મક રીતે લઈ પોતાની કાબેલિયત કમર્શિયલ ફિલ્મોમાં પણ સાબિત કરી દેખાડી અને શક્તિ, નમક હલાલ અને આખિર ક્યોં જેવી સુપર હિટ ફિલ્મોમાં કામ કર્યું. પોતાના માત્ર દસ વર્ષના કેરિયરમાં સ્મિતાએ તે કરીને બતાવ્યું જે કરવામાં આખી જિંદગી ઓછી પડે. 10 વર્ષમાં તેમણે હિંદી અને મરાઠીની આશરે 80 ફિલ્મોમાં કામ કર્યું.
સ્મિતા પાટિલની અંતિમ ઇચ્છા હતી કે તેમનાં મૃત્યુ બાદ તેમને દુલ્હનની જેમ સજાવવામાં આવે. મેકઅપ આર્ટિસ્ટ દીપક સાવંત કહે છે કે સ્મિતાના અવસાન બાદ તેમણે સ્મિતાનો દુલ્હનની જેમ મેક અપ કર્યો હતો.
જેની મોટાભાગની ફિલ્મો VCRના જમાનામાં હોસ્ટેલમાં ભાડેથી VCR લાવીને જોઈ કાઢી હતી એવાં સ્મિતા પાટિલનું જન્મદિને સ્મરણ...
ટિપ્પણીઓ નથી:
ટિપ્પણી પોસ્ટ કરો