એક યુવાનનું મેન્ડોલિન સાંભળીને લતા મંગેશકર રોકાઈ ગયાં …
અને ત્યાંથી શરૂ થઈ લક્ષ્મીકાંત-પ્યારેલાલની અમર સફર
૧૯૫૦ના દાયકાના મધ્યમાં મુંબઈના રેડિયો ક્લબમાં લતા મંગેશકર એક વાર પ્રસ્તુતિ કરી રહ્યાં હતાં. બેકગ્રાઉન્ડમાં મેન્ડોલિન વગાડતા એક યુવાનને સાંભળીને લતાજી એટલાં અભિભૂત થઈ ગયાં કે ગાવાનું રોકીને તરત જ પૂછ્યું – “આ કલાકાર કોણ છે?”
જવાબ મળ્યો – ખૂબ પ્રતિભાશાળી છે, પણ અત્યંત ગરીબ પરિવારમાંથી આવે છે અને કામ મેળવવા મહેનત કરે છે.
લતાજીએ એ જમાનાના દિગ્ગજ સંગીતકારો શંકર-જયકિશન, એસ.ડી. બર્મન અને જયદેવને આ છોકરાની ભલામણ કરી. એટલું જ નહીં, એમણે એને પોતાના નાના ભાઈ હૃદયનાથ મંગેશકર સાથે ટીમ બનાવીને કામ કરવાની સલાહ પણ આપી. જો કે ભાવિના ગર્ભમાં કઈક જુદું જ છુપાયેલું હતું.@k
આ યુવકનો એક મિત્ર, જે સંગીતમાં રસ ધરાવતો હતો, વિદેશ જઈ પશ્ચિમી સંગીત શીખવા ઈચ્છતો હતો અને જો એવું ન બને તો આર.ડી. બર્મન સાથે સંગીતની ટીમ બનાવવાનું તેણે વિચાર્યું હતું.
પરંતુ ભાગ્યે કંઈક બીજું જ લખ્યું હતું –
ભારતીય ફિલ્મ સંગીતને હૃદયનાથ- લક્ષ્મીકાંત કે રાહુલ- પ્યારેલાલને બદલે મળી લક્ષ્મીકાંત-પ્યારેલાલની જોડી.હા, આ સફર કદી સહેલી નહોતી. બંનેએ અનેક સંગીતકારોના સહાયક તરીકે કામ કર્યું, સ્વતંત્ર વાદ્યકાર તરીકે પણ અનેક રત્નો સર્જ્યાં.
એક પ્રસંગ તો ખુબ જ જાણીતો છે —
વાદ્યકાર તરીકે પ્યારેલાલને મદન મોહનજીએ એક ગીત માટે બોલાવ્યા. પણ વ્યસ્તતાને કારણે પ્યારેલાલ થોડા મોડા પહોચ્યા. શિસ્ત માટે જાણીતા મદન મોહને બધાની સામે તેમને ખૂબ ખખડાવી નાખ્યા. અપમાનથી દુ:ખી પ્યારેલાલ સ્ટૂડિયો છોડી ગયા અને બે દિવસ સુધી દેખાયા નહીં.@k
છેલ્લે મદનમોહનજીને સમજાયું કે પ્યારેલાલનું રિપ્લેસમેન્ટ કોઈ રીતે શક્ય નથી, એટલે પોતે ફોન કરીને માફી માંગી.
એ ગીત હતું ફિલ્મ ‘હકીકત’ નું —
“મેં યે સોચકર ઉનકે દર સે ઉઠા થા…”આ ગીતમાં વાયોલિન સાંભળો તો લાગશે જાણે દરેક સૂરમાં પ્યારેલાલે પોતાનો જીવ રેડી દીધો હોય… 
(ગીતની લિંક: https://youtu.be/0wjT3wsygLM?si=AMTOL0L7TkNor-0B )
એક વાર આ ગીત સાંભળશો તો સમજાઈ જશે કે કેમ પ્યારેલાલને રિપ્લેસ કરવા અસંભવ હતા.
ટિપ્પણીઓ નથી:
ટિપ્પણી પોસ્ટ કરો